أحمد السنوسي
الخطوط الليبية موظفة اكثر من 5000 موظف ، والافريقية اكثر من 3500 موظف . مع ان الشركتين عندهم وجهات خارجية تقدر تعدهم على اصابع اليد الواحدة ، وعدد الطائرات للشركتين اللي يشتغلو تقدر تعدهم على نفس اليد .
الشركتين البريقة تبي منهم تقريباً نصف مليار دينار ليبي بالوقود المدعوم ،
الشركتين ما يملكوش اي طائرات، الطائرات ملك وزارة المالية ودين قاعد للمصارف وعلى الخطوط الافريقية والليبية ومش دافعين ثمن الطائرات اللي يقدرو بمليارات الدولارات .
اليوم موظفين الشركتين ما قبضوش مرتباتهم ليهم سبعة شهور، ولا اعلم كيف بيقبضو مزال !
الشركة حتعلن افلاسها وحيتسرح العاملين فيها وحتتلاشى ، ومهما تم دعمها من قبل الحكومة حيقعد عدد موظفيها الضخم جداً حائل بينها وبين النجاح ،
رغم كل المليارات اللي تم ضخها في الخطوط الليبية والافريقية الا انها ستواجه نفس المصير اللي حتواجهه بقية الشركات العامة، زي الكهرباء والانماء والمياه والقمامة والاستثمارات والبنوك …
لا يوجد اي شيء عام ناجح في ليبيا، ودعم القطاع العام هو دعم لمدراء هذه القطاعات العامة
