مَـــقالْ / أمين صالح
تسأل المدون التقني أمين صالح عن دعم المشروعات الخاصة في كل المجالات وعن تمويل المشروعات التقنية بشكل خاص
حيث جاء في إدراجه على صفحته الشخصية ما يلي
يا سيادة الرئيس زي ما تصرفوا على الزواج وعلى طرق وعلى حاجات ممكن انتم تفهموا فيها اكثر مني، وعقلي ما يستوعبها واكيد لاني مسكر راسي وحاطه في امور التقنية فقط..
لا بأس لو تكلم المحافط “مصرف ليبيا المركزي” وتفتحوا للشباب الاقراض..
يعني انا كمواطن ليبي متزوج واعول اطفال راح نقعد نحارب عشرين سنة علشان نمتلك منزل.. وسط اغاني العقارات.. جماعة العقارات يحكوا بخمس اصفار يا حكومتنا الموقرة والخمس اصفار هذي بعدها رقم يبدا من 3 وانت طالع..
بلاش ما نبيش منزل وتوا نديره بمشروعات خاصة بي.. نبي نفتح مشروع تقني.. نبي نفتح مشروع زراعي.. من وين نقدر ناخذ قرض نخلصه زي ماهو بدون ربا.
نبي منحة نكمل بها دراستي او ناخذ بها بعض الدورات او في كذا من كورس علمي في بالي.. هل نمشي للمصرف ونقترض عادي.
في اطباء يبو يفتحوا عيادات وبعضهم يبي يدير تجمعات طبية.
في مهندسين يبو يشاركوا باوراق علمية ويسافروا.
موضوع الزواج غاية طيبة وسامية، بس مش متمحورة الحياة حول الزواج.. هذوم اللي ادبسوا فجاة في الزواج وغرضهم ان يستفيدوا من المنحة بعد سنة راح يطلعوا مظاهرات يبو وظائف ومشروعات ويبو يوكلوا اطفالهم الرضع وزوجاتهم.. هل بنديرولهم بعدين منحة اللي تزوجوا بالمليار الاول..
نذكر الدكتور محمود جبريل الله يرحمه لما كان مدير مجلس التطوير الاقتصادي في 2009 كان يحكي على التنمية المستدامة وكيف يمكن للمواطن ان يكون الثروة لا ان يصرف الكنز. الثروة هو نتاج الانسان.. اما النفط هو الكنز.
فقط حبيت نشارك في حقي بالمنحة في موضوع غير الزواج.. كوني شاب وعندي اهداف مشروعات سواء زراعة باستخدام التقنية او نجيب درونز تزرع او افكار زراعية حديثة او المشاركة في مؤتمرات عالمية الخ. مش كل شيء زواج يا ناس.
والله لو اعطوا القيمة هذي علشان يفتحوا بها مشروع حتى لو مطعم او حمامات بايجار او رصف طرق او سفن صيد من ساحل مليان اسماك او اقامة مدن سياحية او مصانع راهو انعكست عليا كمواطن احسن.
ملاحظة: المنشور ليس سياسي ولا علاقة له باي اطراف او مشاكل.. المنشور تقني حياتي اجتماعي بامتياز
كل التوفيق لمن سيتزوج وعقبال مليار التقنية..
من حق حتى Gamers يشروا تجميعة 12,000 دينار
ومن حقي نشريIT Room 😁
ومن حق طبيب الاسنان كرسي
ومن حق كل واحد يحقق حلمه واحدها الزواج مش كلها
